ភ្នំពេញ ៖ សម្តេចប្រធានរដ្ឋសភា បានស្នើដល់លោកស្រី ប្រធានគណៈកម្មការសភាអាល្លឺម៉ង់ឲ្យជួយជំរុញអ្នកវិនិយោគទុន និងទេសចរអាល្លឺម៉ង់មកកាន់កម្ពុជាឲ្យបានច្រើនឡើង ដើម្បីជំរុញកំណើនសេដ្ឋកិច្ចរបស់កម្ពុជាបន្ថែមទៀត។ ការស្នើនេះក្នុងឱកាសដែលសម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី៣ ខែកុម្ភៈនេះ បានទទួលជួបជាមួយលោកស្រី Dagmar G.Wohrl ប្រធានគណៈកម្មការសហប្រតិបត្តិការសេដ្ឋកិច្ច និងអភិវឌ្ឍ នៃរដ្ឋសភាសហព័ន្ធអាល្លឺម៉ង់ នាវិមានរដ្ឋសភា។
ជាមួយគ្នានេះសម្តេចប្រធានរដ្ឋសភា ហេង សំរិន បានចាត់ទុកដំណើរទស្សនកិច្ចរបស់លោកស្រី Dagmar G.Wohrl នៅកម្ពុជាថា ពិតជាមានសារសំខាន់ចំពោះទំនាក់ទំនងកិច្ចសហប្រតិបត្តិការរវាងសភា ប្រទេសទាំងពីរ។ សម្តេចប្រធានក៏បានសម្តែងនូវការពេញចិត្ត និងវាយតម្លៃខ្ពស់ ចំពោះកិច្ចសហប្រតិបត្តិការនាពេលកន្លងមក រវាងប្រទេសជាតិទាំងពីរកម្ពុជា-អាល្លឺម៉ង់ ដែលបាននាំមកនូវផលប្រយោជន៍ជាច្រើន សម្រាប់ប្រជាជាតិទាំងសងខាង ជាពិសេស អាល្លឺម៉ង់បានរួមចំណែកដល់ការអភិវឌ្ឍនៅកម្ពុជាលើច្រើនវិស័យ។ សម្តេចបានបញ្ជាក់ថា ការរីកចម្រើនរបស់កម្ពុជាបច្ចុប្បន្ននេះ ពិតជាមិនអាចកាត់ផ្តាច់បានពីការចូលរួមវិភាគទានដ៏ថ្លៃថ្លាពីបណ្តាប្រទេសជាមិត្តនៅក្នុងតំបន់ និងសកលលោក ដែលក្នុងនោះក៏មានប្រទេសអាល្លឺ ម៉ង់ផងដែរ ដោយអាល្លឺម៉ង់បានផ្តល់ជំនួយយ៉ាងច្រើនដល់កម្ពុជាដើម្បីលើកកម្ពស់លើវិស័យ សុខាភិបាល អប់រំ អភិវឌ្ឍជនបទ វិមជ្ឈការ និងកំណែទម្រង់រដ្ឋបាលជាដើម។
សម្តេចបានបន្តថា ដោយឡែកសម្រាប់កិច្ចសហប្រតិបត្តិការ ក្នុងក្របខណ្ឌស្ថាប័ននីតិ បញ្ញត្តិ នៃប្រទេសទាំងពីរ បានដំណើរការរួមគ្នាយ៉ាងសកម្ម ក្នុងនោះគឺមានការផ្លាស់ប្តូរដំណើរទស្សនកិច្ចរវាងគ្នា និងគ្នា ដើម្បីចែករំលែកបទពិសោធន៍គ្នាទៅវិញទៅមក ដោយមានសមាជិកសភាកម្ពុជាជាច្រើន បានទៅធ្វើទស្សនកិច្ចសិក្សានៅសភាអាល្លឺម៉ង់ ក៏ដូចជាការចូលរួមក្នុង កម្មវិធីផ្សេងៗផងដែរ។ ជាមួយគ្នានេះសម្តេចប្រធានសភាកម្ពុជា ក៏បានសម្តែងនូវអំណរគុណ ចំពោះរដ្ឋាភិបាល និងពលរដ្ឋអាល្លឺម៉ង់ ដែលបានរួមចំណែក្នុងការស្វែងរកសន្តិភាពនៅកម្ពុជា ព្រមទាំងបានបន្តចូលរួមដល់ការអភិវឌ្ឍប្រទេសកម្ពុជាដល់បច្ចុប្បន្ននេះ។ ទន្ទឹមនេះសម្តេច បានស្នើឲ្យលោកស្រី ប្រធានគណៈកម្មការសភាអាល្លឺម៉ង់រូបនេះជួយជំរុញអ្នកវិនិយោគទុន និងទេសចរណ៍អាល្លឺម៉ង់មកកាន់កម្ពុជាឲ្យបានច្រើនឡើងថែមទៀត ដើម្បីជំរុញកំណើនសេដ្ឋកិច្ចរបស់កម្ពុជាបន្ថែមទៀត។
លោកស្រី Dagmar G.Wohrl មានប្រសាសន៍ថា ឆ្នាំ២០១៧នេះ ទំនាក់ទំនងការទូត រវាងកម្ពុជា អាល្លឺម៉ង់បានឈានដល់ខួបទី៥០ ដែលក្នុងរយៈពេលនេះប្រទេសទាំងពីរមានកិច្ច សហប្រតិបត្តិការជាមួយគ្នាយ៉ាងល្អប្រសើរ។ លោកស្រីថា កម្ពុជាបានឆ្លងកាត់ការលំបាកជា ច្រើនមានដូចជាសង្គ្រាមអូសបន្លាយច្រើនឆ្នាំជាដើម តែមកទល់ពេលនេះកម្ពុជាមានការរីកចម្រើនដ៏គួរឲ្យភ្ញាក់ផ្អើល ហើយថាអាល្លឺម៉ង់នឹងនៅតែបន្តចូលរួមការអភិវឌ្ឍកម្ពុជាជាបន្តទៅ ទៀតផងដែរ។
លោកស្រី Dagmar G.Wohrl បានបញ្ជាក់ថា រដ្ឋសភាមានតួនាទីសំខាន់ក្នុងការកសាងច្បាប់ និងប្រជាធិតេយ្យ ដែលកិច្ចការទាំងនេះ បានដើរតួនាទីយ៉ាងសំខាន់ក្នុងការ កសាង និងអភិវឌ្ឍប្រទេសជាតិ ហើយថាកម្ពុជាមានកម្លាំងពលកម្មច្រើន ដូច្នេះការបណ្តុះបណ្តាលជំនាញដល់ពួកគេគឺជាការសំខាន់៕
កម្ពុជាថ្មី
សុងយោ
No comments:
Post a Comment