ភ្នំពេញ: ដើម្បីជាការលើកសោភណ្ឌភាពរាជធានីភ្នំពេញអោយកាន់តែមានសោភណ្ឌភាពទាក់ទាញមួយកម្រិតបន្ថែមទៀតនោះរដ្ឋបាលរាជធានី បានយកចិត្តទុកដាក់យ៉ាងខ្លាំង ក្នុងការតុបតែងនិងកែលំអរក្រុងឡើងវិញ ដោយមួយរយះពេលចុងក្រោយនេះ រដ្ឋបាលរាជធានី បានធ្វើការណែនាំអោយក្រុមហ៊ុនជាច្រើន កាត់ខ្សែភ្លើងចេញពីមហាវិថីធំៗមួយចំនួន ដោយជំនួសមកវិញនូវការកប់ខ្សែភ្លើងនៅក្រោមដីវិញ។
ជាក់ស្តែងមកដល់ថ្ងៃទី២ខែកុម្ភៈឆ្នាំ២០១៧ រដ្ឋបាលរាជធានីភ្នំពេញ បានបញ្ចប់កប់បណ្តាញអគ្គិសនីក្រោមដីនៅមហាវិថីព្រះមុនីវង្ស រួចជាស្ថាពរហើយ។
មន្ត្រីរដ្ឋបាលរាជធានីភ្នំពេញបានអោយដឹងថាបន្ទាប់ពីបានរត់បណ្តាញអគ្គិសនីក្រោមដីរួច នៅថ្ងៃទី២ខែកុម្ភៈឆ្នាំ២០១៧ រដ្ឋបាលរាជធានីភ្នំពេញ បានដំណើរការអ៊ុតកៅស៊ូនៅមហាវិថីព្រះមុនីវង្ស ចាប់ពីភ្លងស្តុបប្រសព្វផ្លូវលេខ ២៧១ ដល់ស្ពានអាកាសក្បាលថ្នល់។
ពាក់ព័ន្ធនឹងការជួសជុលកែលំអរផ្លូវឡើងវិញ មន្ត្រីរដ្ឋបាលរាជធានីភ្នំពេញបានបញ្ជាក់ថា នេះជាគម្រោងយុទ្ធនាការជួសជុលកែលំអរផ្លូវឡើងវិញ សរុបចំនួន៥៧ខ្សែ នៅក្នុងខណ្ឌចំនួន៩ ក្នុងរាជធានីភ្នំពេញ ដែលរដ្ឋបាលរាជធានីភ្នំពេញក្រោមការដឹកនាំរបស់លោកប៉ា សុជាតិវង្ស អភិបាលរាជធានីភ្នំពេញ បានដាក់ចេញជាគម្រោងក្រោយពី ទទួលការខូចខាតដោយសារទឹកភ្លៀង និងដោយសាររថយន្តដឹកធ្ងន់លួចចូលក្រុងក្នុងរដូវវស្សាកន្លងមក។
ក្រៅពីផ្លូវ៥៧ខ្សែ ក្នុងគម្រោងដែលបានបើកការដ្ឋានជួសជុល ក្នុងយុទ្ធនាការ៣ខែនេះ ក៏នៅមានផ្លូវប្រភេទកៅស៊ូប្រភេទបេតុង សរុបចំនួន១៨០គីឡូម៉ែត្រ ដែលរដ្ឋបាលរាជធានីភ្នំពេញ នឹងត្រូវស្ថាបនានៅក្នុងផែនការឆ្នាំ២០១៧ផងដែរ៕
CEN
ដោយ: ដាវុធ
No comments:
Post a Comment