ភ្នំពេញ ៖ លោកឡេង តុង ប្រធាននាយកដ្ឋានពេទ្យការងារនៃក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា រដ្ឋាភិបាលជប៉ុនបានផ្តល់ថវិកាប្រមាណជាង១លានដុល្លារអាមេរិកជួយទៅលើគម្រោងសុវត្តិភាពវិស័យសំណង់នៅកម្ពុជាសម្រាប់រយៈពេល៣ឆ្នាំ។
លោកឡេង តុង បានបន្តថា គម្រោងស្តីពីសុវត្ថិភាពការងារក្នុងវិស័យសំណង់នេះ នឹងចាប់ផ្តើមអនុវត្តនៅខែមេសា ឆ្នាំ២០១៧ខាងមុខនេះ រយៈពេល៣ឆ្នាំមានតម្លៃប្រមាណជាង១លានដុល្លារ ដើម្បីកាត់បន្ថយគ្រោះថ្នាក់ផ្នែកសំណង់នេះ ហើយគម្រោងនេះយើងសហការជាមួយអង្គការអាយឡូ។ លោកបានបន្ថែមថា បញ្ហាវិស័យសំណង់នេះកន្លងមកខាងម្ចាស់ការដ្ឋានសំណង់នីមួយៗមិនសូវសហការល្អជាមួយក្រុមការងារយើងទេ។ ដូចនេះទាមទារឲ្យមានកិច្ចសហការគ្នាល្អបន្ថែមទៀតរវាងក្រសួងការងារ និងបណ្តុះបណ្តាវិជ្ជាជីវៈជាមួយក្រសួងរៀបចំដែនដីនគរូបនីយកម្ម និងសំណង់និងស្ថាប័នពាក់ព័ន្ធនានាទៀត។
លោកឡេង តុង បានមានប្រសាសន៍ឲ្យដឹងទៀតថា ក្រៅពីនេះឆ្នាំ២០១៧នេះ នាយកដ្ឋានពេទ្យការងារផ្តោតសំខាន់លើការអនុវត្តតាមអនុក្រឹត្យស្តីពីសុវត្ថិភាពការងារ ដែលអនុក្រិឹត្យនេះមានសារៈសំខាន់ណាស់ក្នុងការប្រមូលផ្តុំអន្តរក្រសួងដើម្បីចូលរួមទប់ស្កាត់បញ្ហាសុវត្តិភាពការងារនៅតាមរោងចក្រសហគ្រាសបានកាន់តែល្អប្រសើរ។ ក្នុងនោះយើងនឹងមានបង្កើតគណៈកម្មាការធិការសុវត្ថិភាពសហគ្រាសមានតំណាងសហគ្រាសកម្មករនិយោជកចូលរួមផងដែរ។ គណៈកម្មាធិការនេះនឹងវិភាគវាយតម្លៃទៅតាមស្ថានការជាក់ស្តែងនីមួយៗដើម្បីធ្វើយ៉ាងណាកុំឲ្យមានបញ្ហាគ្រោះថ្នាក់ដល់កម្មករយើង។ ដូចជាបញ្ហាសុវត្ថិភាពកម្មករធ្វើការនៅកន្លែងសំណង់ កម្មករដួលសន្លប់និងគ្រោះថ្នាក់ការងារ។
លោកបានបញ្ជាក់ថា លើសពីនេះគឺដើម្បីការពារសុខភាព និង សុវត្ថិភាព របស់កម្មករនិយោជិត កែលម្អលក្ខខណ្ឌការងារ រួមចំណែក ក្នុងការកាត់បន្ថយភាពក្រីក្រ និងការធ្វើ ឲ្យប្រសើរឡើង នូវជីវភាពរស់នៅ របស់កម្មករនិយោជិត ។
លោកបានបន្ថែមថា« នេះជាគោលបំណង ដ៏ធំបំផុត របស់រាជរដ្ឋាភិបាល ក្នុងការធ្វើឲ្យប្រសើរឡើង នូវសុខភាព និងសុវត្ថិភាព ទាំងកម្មករនិយោជិត ក្នុងសេដ្ឋកិច្ចរៀបរយ ឬមិនរៀបរយក្តី និយាយរួម គឺជាការធ្វើឲ្យប្រសើឡើង នូវសុខភាព និងសុវត្ថិភាព សម្រាប់ប្រជាជនទាំងអស់គ្នា ឈានទៅបង្កើនផលិតភាព ផងដែរ »៕
កម្ពុជាថ្មី
សំអឿន
No comments:
Post a Comment